20190906. As festas patronais de Santa Uxía celebraranse en Ribeira do 11 ao 14 de setembro coincidindo, ademais, con que este ano o día 12 será festivo local despois de que se impuxese ao martes de Entroido nun pleno celebrado o pasado mes de novembro. Deste xeito, unha vintena de eventos musicais, culturais e litúrxicos sucederanse na cidade. O cura párroco Alfonso Mera e a concelleira de Cultura, María Sampedro, foron os encargados de presentar a programación destes festexos.
Aínda que o groso de actividades se concentra o xoves 12 e o venres 13, tamén se levarán a cabo numerosas propostas o mércores 11 e sábado 14 destacando, por exemplo, a actuación da orquestra Panorama o primeiro día de festas, a partir das 22.30 horas, no paseo do Malecón; así como a inauguración da exposición e entrega do X Premio Internacional Atlante do Gravado, no Museo do Gravado de Artes, ás 13.00 horas do derradeiro día. Así, as catro xornadas ofrecerán contacontos, teatro, arte, música, espectáculos, xogos e actos litúrxicos. Actividades para tódolos gustos e idades. Tal e como manifestou a edil “despois de dous anos sen ser festivo este día, creo que lle temos que dar un realce” cualificando o calendario de “sinxelo, pero completo.”
A propia parroquia de Santa Uxía levará a cabo, entre outros, as exposicións Mundo en feminino e Soñando un futuro, ambas organizadas por Mans Unidas, ademais de conferencias, concertos e a Misa solemne do xoves 12, ás 12.00 horas, cantada pola Coral do Círculo Mercantil e Industrial de Ribeira coa posterior procesión. Así mesmo, o párroco anunciou que o luns 16 acudirá unha coral de Uruguai acompañada dunha coral xuvenil de Noia, “ese día será para nós o día que culminaremos todos estes actos e toda esta festa.”
Tanto María Sampedro coma Alfonso Mera animaron á veciñanza á involucrarse nesta festividade.
