20190910 Por moitas cousas que pasen na vida, Rianxo nunca deixará de ser unha vila literaria. Así o certifican as múltiples actividades creativas que acubilla cada ano o concello, mesmo á volta do verán, cando o regreso aos hábitos cotiáns non deberan, sobre o papel, deixar moita marxe para a inspiración. Pero a celebración do Obradoiro de Creación Literaria que organizan a Escola de Escritores da AELG e máis o Concello de Rianxo demóstranos precisamente o contrario: que aquí fíxose, faise e farase sempre literatura.
A edición 2019 do obradoiro desenvolverase baixo o epígrafe As liñas no espello e será impartida polo novelista e poeta limiao, e boirense de adopción, Antón Riveiro Coello (autor de obras tan senlleiras como A quinta de Saler, As rulas de Bakunin ou A ferida do vento), cunha sesión maxistral a cargo da tamén escritora Inma López Silva (responsábel de novelas e ensaios tan sobranceiros como Concubinas ou Maternosofía).
A actividade desenvolverase nos sábados de outubro, novembro e decembro, en horario de 11:00 a 13:00 horas, no Auditorio de Rianxo. Segundo informa o Concello e máis a asociación AELG, está destinada a persoas maiores de 15 anos que “teñan interese na escrita e na creación” e ofértanse un total de 20 prazas (realizarase cun mínimo de 8 inscricións).
O obradoiro está especialmente indicando para quen busque xeitos e metodoloxías para transformar a realidade nunha contorna mellor do que é, tanto na palabra escrita como na súa verdadeira dimensión (o poder transformador da literatura, que transforma a páxina, o escritor, a escrita e máis o mundo).
A inscrición, de balde, poderase realizar a partir do luns 9 de setembro, ás 13:00 horas, e ata o 26 de setembro, ás 14:00 horas, na web concelloderianxo.gal. As prazas asignaranse por orde de solicitude. Terán preferencia aquelas persoas que non participasen na primeira edición deste obradoiro (en 2018).
