20190919 O dramaturgo, actor e narrador ribeirense Quico Cadaval vai dar a saída, este mes de setembro, á celebración dos 15 anos da compañía de espectáculos Excéntricas, na que milita. E farao con Vacas, Guerras, Porcos e Cregos, unha obra que xa tivo a súa estrea en Madrid (no Festival Poéticas Contemporáneas) e que agora poderemos ver moito preto da nosa casa (no Fórum Metropolitano da Coruña), o día 27 deste mes.
O espectáculo de Cavadal para a devandita data é a proba visíbel da transformación que están a sufrir nos últimos tempos os seus repertorios (os teatros da palabra, as historias e sucedidos con base real que constitúen a parte máis miúda das consideradas artes escénicas), cada vez máis enfocados a tirar abaixo calquera atranco que poida interpoñerse entre o poder evocador da palabra, por unha banda, e o público, pola outra.
A nivel de argumento, a obra xira arredor dun antepasado, Xuán O Fino, que era “un home bo coa familia, pacífico e bo viciño, amigo de facer favores, un personaxe carente de interese para o público, por estar exento de maldade”. Mais observando o entorno do patriarca, segundo nos advirte o autor, aparecen historias extraordinarias protagonizadas por personaxes “menos virtuosos”: vacas, curas, mentireiros, sementais, barbeiros, porcos, artistas de cine e militares.
E, tamén, historias paralelas e complementarias como a do crego que domina a Lüger e a retórica, a do barbeiro profético ou a de o alcumado como O Ghacheiro, un performer fedello, enredante e pícaro, que fai confluír, para asombro da veciñanza, unha das súas farsas co desembarque de Normandía, o seis de xuño de 1944. Novamente a principal fonte de inspiración de todos estes acontecementos, normais á par que máxicos, non é outra que a parroquia de Carreira (Ribeira), á que pertence Cadaval e que se sitúa, lémbranos o propio contacontos, nas coordinadas 42º23’33”, “xusto en fronte de Boston-Masachusetts”.
