20190911 Até 39 concellos da provincia da Coruña, entre os que se atopan seis municipios da nosa contorna (A Pobra, Boiro, Ribeira, Rianxo, Lousame e Porto do Son), vanse ver beneficiados polo novo programa de mellora medioambiental da Deputación. Así o confirmou onte a entidade provincial, dando a coñecer o importe total das axudas (83.565 euros) que se van destinar a financiar pequenas actividades que contribúan a “manter e mellorar a contorna natural e a calidade ambiental da provincia da Coruña”. Entre estas accións figuran programas para tirar proveito da resina (o caso de Rianxo), para o control de especies invasoras ou para a xestión sustentábel de todo tipo de refugallos. Do devandito importe total, os concellos recibirán algo máis de 2.000 euros para dar financiamento a cadansúas iniciativas medioambientais.
Polo que respecta a Boiro, as axudas irán destinadas á elaboración do plan de xestión de residuos municipais, incluíndo propostas de actuación en materia de reciclaxe.
No caso de Pobra, búscase dar pulo á creación do catálogo de protección do patrimonio natural do municipio.
No que atinxe a Rianxo, o proxecto consiste en achegar formación para o aproveitamento da resina dos piñeiros.
Ribeira, pola súa banda, impulsará actividades para loitar contra a contaminación acústica (elaboración da ordenanza municipal de ruídos).
Porto do Son ten entre mans un programa de educación e comunicación ambiental dirixido á poboación en xeral e a colectivos específicos (centros educativos, asociacións veciñais, comunidades de montes…), sobre a concienciación sobre o uso das toalliñas e bastóns hixiénicos e outros materiais de uso diario. Lousame impulsará medidas para o aforro enerxético.
