O mellor da arte gráfica internacional pode verse estes días en Rianxo

20190920 Esta semana inaugurouse en Rianxo, no Centro Sociocultural do Auditorio, a mostra resultante do XIII Premio Internacional de Arte Gráfica Jesús Núñez, convocado pola Deputación da Coruña e a Fundación CIEC. A exposición, que poderá visitarse até o 1 de outubro, é unha escolma artística itinerante que está a pasar por dez concellos da provincia, e que inclúe unha selección de 30 obras das 142 que foron presentadas ao devandito certame. A escolma final é un salientábel resumo das actuais tendencias artísticas internacionais en materia de artes gráficas (hai artistas de primeira liña de países como México, Irán, Polonia ou Alemaña).

Entre as obras expostas destaca o primeiro premio acadado polo polaco Wieslaw Haladaj coa xilografía Appearance 22 e os accésit The extended night de Mehdi Darvishi e Forma y vacío de Rubén Morales Lara.

A mostra, coordinada polo selo editorial e consultora cultural Ouvirmos, inclúe no seu roteiro os concellos de Arteixo, As Pontes, Betanzos, Carballo, Carnota, Culleredo, Porto do Son, Rianxo, Sada, Valdoviño.