20190906 Mentres o lume non ten visos de remitir na xeografía galega esta primeira semana de setembro, deixando pegadas recentes na comarca do Barbanza (Porto do Son, Boiro, Pobra), continúan as investigacións dos corpos policiais por atopar os responsábeis das vagas incendiarias. Entre outras cousas porque a acción humana, voluntaria ou non, segue a ser a principal causa dos incendios. Hoxe mesmo, axentes da Policía Autonómica de Galicia, en colaboración con axentes forestais da nosa terra, comunicaron o esclarecemento da autoría dun incendio forestal orixinado este venres no concello de Pobra.
Os policías do Grupo de Investigación de Incendios da Xefatura de Santiago de Compostela procederon a tomar declaración como investigadas a dúas persoas como presuntas autoras dun lume forestal que tivo lugar hoxe ás 09.10 horas na parroquia de Posmarcos e que, segundo os máis recentes cálculos, afectou a unha hectárea e xa está estabilizado. O incendio, segundo as primeiras pescudas, orixinouse “pola neglixencia dos investigados”. A rápida intervención impediu a súa proliferación, malia que as condicións climáticas (o forte nordés que azouta Galicia) eran as máis idóneas para a propagación das lapas.
As dilixencias remitiranse ao xulgado de garda do concello coruñés de Ribeira.
A Policía Autonómica engade que no que vai de ano, un total de 63 persoas foron investigadas como presuntas autoras de lumes nos nosos montes.
