20190926. Continúa en Rianxo o Ciclo de Cine Euroárabe AMAL en ruta co documental Zagros, de Sahim Omar Kalifa -ás 21.00 horas-. Trátase dunha peza audiovisual que narra a historia dun pastor que vive nunha aldea kurda coa súa muller embarazada, Havin, e a súa filla Rayhan. O seu pai dille que as persoas rumorean sobre Havin, dicindo que ten unha aventura e acusándoa de adulterio. Zagros elimina as preocupacións de seu pai mentres confía na súa esposa e négase a dar crédito aos rumores. Pero a longametraxe conta o destino tráxico desta parella. Coa filla de ambos, a muller fuxe de Kurdistán a Bélxica. Convencida da súa inocencia, Zagros decide buscala en Bélxica co obxectivo de comezar xuntos unha nova vida. Pero en Bruxelas, descóbrese que Havin non dixo toda a verdade, polo que Zagros comeza a dubidar. Unha decisión cada vez máis difícil que irá sumindo ao protagonista na desesperación.
A cinta foi a primeira longametraxe do director, conseguindo alzarse co Gran Premio do Festival de Gante. Sahim Omar Kalifa naceu en 1980 en Zakho, no Kurdistán iraquí. É un cineasta belga-kurdo radicado en Bélxica. No 2008 obtivo o seu máster en cine no Saint-Lukas Film School, en Bruxelas. Kalifa gañou 96 premios internacionais coas súas curtametraxes Land of héroes, Bagdad Messi e Bad Hunter. Ademais, foi preseleccionado aos premios Óscar en dúas ocasións.
As outras pezas audiovisuais a proxectar serán Of fathers and sons, de Talal Derki -o venres 27, ás 20.30 horas-; Sheikh Jackson, de Amra Salama -o venres 27, ás 22.30 horas-; Ghost Hunting, de Talal Derki -o sábado 28, ás 20.30 horas-; e El Cairo confidencial, de Tarik Saleh -o sábado 28, ás 22.30 horas-.
As entradas son de balde e ata completar a capacidade da sala Arcos Moldes do Auditorio municipal, desde unha hora antes das sesións.
Este evento, organizado en colaboración coa Fundación Araguaney-Puente de Culturas, percorre o cine árabe actual. A cita, que se estenderá ata o sábado 28, trátase dunha versión resumida da Semana do Cine Euroárabe AMAL 2018, celebrada en outubro do pasado ano en Santiago de Compostela.
