20190930. No pleno celebrado na tarde do venres con motivo dos orzamentos de Ribeira para 2019, o grupo municipal do BNG abstívose. O Bloque manifesta que é “moi crítico coa xestión do Partido Popular” respecto dalgunhas cifras e destino destes presupostos, mais “hai cuestións que temos que dicir que non son negras e negativas.”
Entre as “principais carencias” expresan que o municipio “continúa carecendo de chan industrial”, “seguimos sen saber que pasa coa ARI (Área de Rehabilitación Integral) que foi aprobada por este pleno” ou que “tampouco existe transparencia”, entre outros.
Por outra banda, sinalan que entre as “positivas” figuran accións no ámbito da dependencia, loita contra a violencia machista, deportes, transporte público, conxelación de impostos e melloras laborais para o persoal municipal, as cales “son propostas nas que o BNG traballou arreo para que fosen unha realidade ou se comprometeu con entidades, veciñanza e colectivos e fan parte da nosa acción política para mellorar o benestar das veciñas e veciños de Ribeira.”
Así, a formación afirma que a súa abstención débese “exclusivamente para garantir o cumprimento de compromisos feitos diante da veciñanza e de colectivos sociais de Ribeira e das súas parroquias.”
