20190913. A casa da cultura de Castiñeiras acolleu na tarde do venres unha asemblea aberta entre a veciñanza e o BNG ribeirense para falar da instalación do proxecto dunha depuradora de mexillón no peirao desta parroquia.
Os concelleiros Luís Pérez Barral e Xosé Vázquez Cobas, acompañados da deputada Montse Prado, informaron á veciñanza sobre os expedientes e os trámites que se foron dando desde o comezo ata a actualidade. Neste sentido, Vázquez Cobas manifestou que “no BNG levamos traballando meses a nivel municipal estudando os expedientes e esixindo que se cumprise coa normativa.” Tras unha revisión da documentación, os nacionalistas sinalaron que detectaran a carencia dos permisos municipais preceptivos por parte da empresa, polo que a obra tivo que ser paralizada.
Respecto da lei de Portos de Galicia do 2017, a deputada nacionalista indicou que “esa lei foi feita para favorecer a especulación e promover os intereses privados, pasando por riba de veciñanza e concellos.”
Prado criticou a “opacidade coa que actúa Portos, Costas e Concello de Ribeira ao non informar á veciñanza, mesmo permitindo ilegalidades”, polo que confirmou que aproveitará a iniciativa parlamentar para saber se a obra conta coa declaración de impacto ambiental e transmitir o malestar da xente.
O BNG subliñou que non se trata de evitar que se asenten empresas que xeren riqueza no municipio, “quen diga iso do Bloque mente”, senón de procurar que se instalen “en localizacións axeitadas para que provoquen a mínima afección ambiental e social.”
Por último, as veciñas e os veciños expresaron a súa preocupación e comprometéronse a seguir loitando.
