20190920. O Concello de Ribeira informa de que está en marcha a actuación destinada a mellorar a alumeado da franxa litoral a través da instalación de preto de 500 luminarias LED entre Palmeira e Aguiño. Concretamente, a iniciativa comprende a instalación de luces no paseo de Insuela, no paseo da Ameixida, no parque de Punta do Castro e nas pasarelas das praias de Castro e A Catía, así como a renovación das luces do paseo do Carreiro e do porto de Aguiño.
Froito dos traballos xa emprendidos, onte pola noite comezaron a funcionar en fase previa á súa recepción as luminarias dispostas no paseo marítimo da Ameixida. En concreto, 72 balizas que percorren o longo da infraestrutura.
Ademais da referida intervención, o proxecto inclúe subactuacións no paseo de Insuela, a iluminación mediante 46 balizas e 4 farois altos do tramo comprendido entre a praia e a zona do cámping; no parque de punta do Castro, 2 balizas e 26 luminarias sobre columnas, así como 2 proxectores nas pistas deportivas e 4 na zona de aparcamento; as pasarelas das praias de Castro e A Catía e o paseo do Carreiro disporán de 221 balizas entre tódolos tramos, ademais de alumeado para 9 farois na rúa adxacente Andrés Torres Queiruga; e no porto de Aguiño substituiranse tódalas luminarias existentes nas vías que percorren o porto e máis o aparcamento por luces LED, ao igual que a zona residencial situada na contorna, substituíndose un total de 100 luminarias.
A adxudicación do contrato dividiuse en catro lotes, dos cales o primeiro e o terceiro (correspondentes ao paseo de Insuela e ao parque de punta do Castro, praias de Castro-Catía e Carreiro) recaeron en Ferrovial Servicios S.A. por un prezo total de 331.625’36 euros (44.930’76 euros + 286.694’60 euros) e os segundo e cuarto (paseo da Ameixida e porto de Aguiño), en Instalaciones Eléctricas Coruñesas por 116.004’1 euros (58.523’49 euros + 57.480’61 euros). Así, o investimento global ascende a 447.629’46 euros.
Esta actuación enmárcase na EDUSI Máis Riveira Atlántica 2020, financiada nun 80% polo Fondo Europeo de Desenvolvemento Rexional (FEDER) dentro do Programa Operativo de Crecemento Sostible (POCS) 2014-2020. Adscríbese a liña de actuación deste plan denominada Mellora da Eficiencia Enerxética na Administración Pública, dentro do obxectivo temático número 4 (Economía Baixa en Carbono).
