20190909 A fin de semana volveu o lume a Barbanza, logo dos incendios que afectaron a Porto do Son e, con moita menor virulencia a Pobra (Posmarcos) e Boiro (Cures). Logo de que estes focos foran controlados e extinguidos, o venres pola noite iniciouse na parroquia de Oleiros, en Ribeira, un novo lume que terminou por afectar tamén ao termo municipal de Porto do Son. Logo dun intenso traballo de extinción (case dúas xornadas de traballo), ficou extinguido ás 20.30 horas deste domingo.
Segundo informa a Consellería de Medio Rural, as máis recentes estimacións sitúan en 197 hectáreas a superficie de monte afectada, das cales 160 eran arboradas (piñeiros e eucaliptos principalmente) e 37 de rasas. Na súa extinción participaron 25 axentes, 43 brigadas, 24 motobombas, 2 pas, 9 helicópteros e 5 avións, así como efectivos da Unidade Militar de Emerxencias (UME).
Sobre as orixes do lume de Oleiros novamente hai que relacionalas coa acción humana, unida á axuda involuntaria do forte de nordés que soprou durante toda a fin de semana e boa parte da semana previa (hoxe a situación climática adversa tómase un respiro, que o nordés deixou de soprar, e estímase que a situación estenderase até a mañá).
O conselleiro do Medio Rural, José González, acompañado polo director xeral de Emerxencias e Interior, Santiago Villanueva, achegouse este sábado á zona afectada polo incendio, onde afirmou que se atoparon varios obxectos incendiarios en montes afectados polo lume. Ademais, as autoridades engadiron que xa hai sospeitosos de telo causado.
