20190923. Esta mañá procedeuse á entrega de diplomas do curso de ‘Monitor/a de Comedor Escolar’ organizado pola Asociación Amicos en colaboración co Concello da Pobra do Caramiñal e co CAD (Centro Atención á Discapacidade) pobrense. Esta acción formativa está financiada pola Obra Social ‘la Caixa’ e polo Fondo Social Europeo, enmarcándose no programa de emprego que se leva a cabo desde Amicos co obxectivo de mellorar a empregabilidade das persoas con discapacidade.
Nesta ocasión, un total de dez alumnos remataron a acción formativa destinada a adquirir as competencias básicas para poder desempeñar acompañamento e coidado de alumnado, resolución de conflitos, educación nutricional e para a saúde, así como conseguir un funcionamento correcto destas colectividades.
O acto de entrega estivo presidido pola concelleira de Servizos Sociais pobrense, Estefanía Ramos; a directora de CaixaBank na Pobra, María del Pilar García García; a directora do CAD, Julia Rial Fondo; e o director xeral de Amicos, Xoán España.
Xoán España indicou que unha das participantes xa se atopa traballando, pois “estes programas teñen un índice de inserción bastante alto.” Ademais, manifestou que agarda que esta acción se prolongue no tempo, xa que “creo que pode ser un camiño para xerar un itinerario de futuro de cara a posible inserción laboral.”
Pola súa parte, Pilar García sinalou que con isto preténdese “a integración social, laboral, e que mellor ferramenta para integrarse que ter un traballo.”
Na súa intervención, a edil Estefanía Ramos expresou o seu agradecemento ás entidades presentes e felicitou aos participantes.
