20190906. Axentes da Policía Nacional adscritos á Comisaría de Ribeira procederon á detención de dous individuos de 26 e 47 anos respectivamente, naturais desa localidade, como presuntos autores dun delito contra a Saúde Pública na súa modalidade de tráfico de drogas e outro de desobediencia.
Os axentes atopábanse no marco dunha investigación por tráfico de drogas, realizando vixilancias e seguimentos en torno a un dos detidos, xa que tiñan constancia de que este retomara o negocio ilícito de venta de sustancias estupefacientes, unha vez recobrada a súa liberdade tras ser detido meses atrás polo mesmo motivo e enviado a prisión provisional.
Despois de ser localizado circulando a bordo dun vehículo conducido polo detido de maior idade, os axentes procederon a darlles o alto, usando para dito fin os medios luminosos e acústicos do vehículo policial, facendo caso omiso ás indicacións dos actuantes e dándose á fuga. Tal circunstancia comunicouse a outras dotacións policiais e, momentos máis tarde, foron interceptados por outra dotación e, unha vez parados, o principal investigado deuse á fuga a pé, podendo ser interceptado tras unha breve persecución.
Tras isto, procedeuse á identificación, cacheo e detención de ambos, intervíndolles 19 bolsiñas termosalladas de cocaína, tres teléfonos móbiles, 1425 euros en efectivo en billetes de diverso valor, 2 navallas e o vehículo.
A un dos detidos cónstanlle antecedentes policiais por feitos similares, sendo postos a disposición da Autoridade Xudicial.