20190905. Un grupo de alumnos do Grip Surf School asistirá por cuarta vez ao Pantín Classic. Deste xeito, na xornada do sábado, cincuenta cativos terán a ocasión de familiarizarse coa nomeada competición acudindo a unha das citas máis prestixiosas de Europa. Así o deron a coñecer Álex Sebastián, representante da citada escola; Chema Fernández, principal patrocinador e propietario de Jael Joyería en Santiago e A Coruña; e a primeira tenente de alcalde, María Sampedro.
Álex Sebastián expresou o seu agradecemento polo patrocinio tanto de Jael Joyería coma de Tag Heuer, así como a colaboración do Concello, que ofreceu apoio loxístico sufragando o desprazamento a un “campionato QS/10000, que quere dicir que é a segunda división de surf, o máis potente e veñen os mellores surfistas de todo o mundo a participar.” Polo tanto, manifestou que é unha boa oportunidade para que a rapazada coñeza a competición, inseríndoos neste eido.
Pola súa parte, Chema Fernández precisou que desde a súa empresa fomentan “o deporte base e, sobre todo, deportes que son menos visibles”, impulsando a ximnasia rítmica ou o surf, entre outros. Ademais, indicou que colaboran con todo o equipo de Grip Surf School porque “desde o principio tiñan un apoio moi grande deica os nenos, preocupábanse moito de ensinarlles o que é o mar, os perigos do mar, como se deben comportar”, salientando o seu labor ecolóxico mediante a limpeza de areais. Tamén anunciou que os rapaces terán a ocasión de manter un encontro con Clyde Martin, lenda deste deporte e directivo no sindicato mundial de surfistas, e participarán nun clinic impartido por un surfista profesional participante no Pantín Classic, cuxa identidade está sen concretar dependendo do calendario deportivo.
Na súa intervención, a edil María Sampedro subliñou que desde o Concello seguirán colaborando e apoiando accións que contribúan a educar en valores ás crianzas, fomentando o deporte base e os deportes náuticos.