20190919. O municipio de Rianxo será escenario durante a próxima semana de multitude de actividades de diversa índole e para diferentes públicos. Así, a veciñanza e visitantes poderán percorrer o mundo artístico, audiovisual e literario.
Pero xa esta semana comezou a mostra do XIII Premio Internacional de Arte Gráfica ‘Jesús Núñez, ano 2018, promovido pola Deputación da Coruña. A exposición está dispoñible no Auditorio ata o 1 de outubro.
Do mércores 25 ao sábado 28, desenvolverase o Ciclo de Cine Euroárabe AMAL en ruta, unha versión resumida da Semana do Cine Euroárabe AMAL 2018, celebrada en outubro do pasado ano en Santiago de Compostela. Este evento, organizado en colaboración coa Fundación Araguaney-Puente de Culturas, percorre o cine árabe actual. Os filmes a proxectar serán Alma Máter, de Philippe Van Leeuw -o mércores 25, ás 21.00 horas-; Zagros, de Sahim Omar Kalifa -o xoves 26, ás 21.00 horas-; Of fathers and sons, de Talal Derki -o venres 27, ás 20.30 horas-; Sheikh Jackson, de Amra Salama -o venres 27, ás 22.30 horas-; Ghost Hunting, de Talal Derki -o sábado 28, ás 20.30 horas-; e El Cairo confidencial, de Tarik Saleh -o sábado 28, ás 22.30 horas-. As entradas son de balde e ata completar a capacidade da sala Arcos Moldes do Auditorio municipal, desde unha hora antes das sesións.
O sábado 28 terá lugar na Biblioteca Pública Municipal Castelao, ás 12.00 horas, o espectáculo Kenka un Kenko, o cal mestura contos, retrousos, adiviñas, literatura infantil, tradición oral e música en directo. Esta proposta, que está dirixida a crianzas de entre 6 meses e 4 anos de idade, corre a cargo de Cris de Caldas e enmárcase dentro do programa Ler conta moito.
Ademais, o salón de actos do Auditorio acollerá na xornada do sábado 28, ás 19.00 horas, a presentación do libro El vals de las hormigas, de Ana Valín.
