20190911. Os festexos de Santa Uxía dan hoxe o pistoletazo de saída a catro xornadas de celebracións. A cidade de Ribeira volve encherse así de entretemento, sen esquecer o carácter devoto, despois das festas propias do verán, do 31 de xullo ao 4 de agosto, e de Artemar, do 15 ao 18 de agosto.
Ás 21.15 horas deste mércores terá lugar na igrexa parroquial o concerto de música sacra a cargo de Ange-Patrick Duhy; mentres que, a partir das 22.30 horas, desenvolverase a actuación da orquestra Panorama no paseo do Malecón, con segundo pase ás 00.30 horas.
Mañá, xoves 12, festivo local, levarase a cabo parte do groso de actividades. Así, as bombas de palenque anunciarán o comezo do día, ás 10.00 horas, para media hora máis tarde, dar paso ás ruadas. Ás 12.00 horas, oficiarase a Misa solemne na honra de Santa Uxía cantada pola Coral do Círculo Mercantil e Industrial de Ribeira coa posterior procesión acompañada da Banda de Música OJE de Ferrol e as Cantareiras da Asociación Amas de Casa de Ribeira. Para aquelas persoas que non poidan asistir á mañá, oficiarase Misa novamente pola tarde, ás 20.30 horas. Cara ao mediodía, ás 13.15 horas, o adro servirá de escenario para a actuación da Banda de Música OJE de Ferrol. Tamén haberá xogos para os máis pequenos da casa co parque de inchables disposto na Porta do Sol desde as 16.00 ata as 19.00 horas e co espectáculo Viravolta: a maleta de Don Attilio no mesmo emprazamento. Finalmente, a noite será amenizada, a partir das 22.15 horas, polo concerto de Queiman e Pousa: Un verso, un cantar no paseo do Malecón.
