20190916. Hoxe, luns 16, abre o prazo de preinscrición no Grupo Municipal Infantil de Teatro de Ribeira. Esta escola está dirixida a nenas e nenos de entre 7 e 12 anos de idade.
Cómpre lembrar que se retomou o ano pasado baixo a dirección do profesor Óscar Romero co obxectivo de ofrecer aos máis cativos unha oportunidade de espertar as súas aptitudes artísticas, creativas e sociais a través dunha educación teatral temperá.
O inicio das clases está previsto para o 9 de outubro e o remate para o 31 de maio de 2020. Terán lugar no salón de actos do Auditorio municipal, os mércores de 18.30 a 20.00 horas. Unha das principais accións que se realizarán no curso será a de preparar unha representación de cara á Mostra de Teatro Infantil no mes de maio.
O presente prazo de preinscrición abrangue desde o 16 de setembro ata o 2 de outubro coa finalidade de coñecer a previsión de participantes, establecendo un mínimo de 10 para desempeñar a actividade e un máximo de 20. A tal efecto, os interesados poden achegarse ao Centro Cultural Lustres Rivas, enviar un correo electrónico a culturaefestexos@riveira.com ou chamar ao teléfono 981835650.
De haber quórum, a formalización da matrícula terá lugar do 7 ao 31 de outubro, cun único prezo de 127’92 euros, podendo recoller o correspondente impreso no Centro Cultural Lustres Rivas.
