20190909. Integrantes da plataforma de afectados polo proxecto de instalación da depuradora de mexillón en Castiñeiras celebraron o domingo unha nova xuntanza, na que se trataron diversas cuestións referentes a novas accións para loitar contra o inmoble que se pretende emprazar nesta parroquia ribeirense.
Deste xeito, concretouse que se entrevistarán ao longo desta semana con representantes dos grupos políticos do PSdeG-PSOE, BNG, PBBI e Suma Ribeira. Así mesmo, acordouse manter unha xuntanza co patrón maior da confraría de Ribeira, José Antonio Pérez, e o seu homólogo na confraría de Carreira-Aguiño, José Antonio Santamaría, pero estes encontros aínda están pendentes de ser definidos. Esta decisión vén dada “para saber se están informados do proxecto, que penso que si, e cal é a súa postura porque tamén lles afecta a eles”, tal e como manifestou Andrés Lijó, voceiro do colectivo. Ademais, están avanzando no proceso de reactivación da asociación veciñal A Batiola co obxectivo de facer as xestións oportunas a través desta entidade, non no nome de particulares como se viña facendo.
Agora atópanse agardando por unha comunicación por parte do Concello de Ribeira despois da reunión mantida o mércores pasado coa tenente de alcalde, María Sampedro, na cal os asistentes insistiron en falar co alcalde Manuel Ruiz. Andrés Lijó indica que, no que respecta a Portos de Galicia, solicitarán por escrito ou por vía telemática unha cita con este ente para que “un técnico nos explique alí o proxecto da depuradora.” Tamén se puxeron en contacto con Costas de Galicia, pois entenden que “aínda que sexa unha concesión de Portos, afecta a Costas” ao ser no litoral onde se pretende situar a construción.