20190905. O ribeirense Centro Cultural Lustres Rivas albergará mañá venres, ás 21.00 horas, a inauguración da exposición Sensacións. Trátase dunha mostra colectiva ofrecida pola asociación Alterarte que reúne 36 obras de preto de vinte artistas desta agrupación, combinando distintas técnicas e formatos, desde acrílicos, óleos, gravados ou acuarelas ata mixtas sobre táboa, lenzo ou papel.
A asociación Alterarte é unha entidade sen ánimo de lucro que ten como obxectivo a promoción das distintas manifestacións culturais e a posta en valor do patrimonio abrindo o mundo da arte ao público en xeral.
A exposición estará aberta ata o 31 de outubro, en horario de luns a venres de 10.00 a 14.00 horas e de 19.00 a 21.00 horas, así como os sábados de 11.00 a 14.00 horas e de 19.00 a 21.00 horas.
