20190918. O Espazo Xuvenil do Concello de Ribeira, que está dirixido a mocidade con idades comprendidas entre os 14 e 19 anos, reabrirá este venres, 20 de setembro, coincidindo coa semana de inicio do curso no ensino secundario. O servizo estará aberto os venres, sábados e domingos, en horario de 17.00 a 21.00 horas, no primeiro andar do edificio do mercado municipal.
Ademais de facilitar así á xuventude un lugar onde reunirse e dispoñer de alternativas de ocio -biblioteca, xogos de mesa e conexión wifi, entre outros- unha vez máis celebraranse unha serie de actividades complementarias e gratuítas coas que enriquecer a experiencia dos usuarios.
Así, Eli Ríos ofrecerá un obradoiro sobre a diversidade sexual na adolescencia o sábado, 21 de setembro, ás 18.00 horas, dentro do programa Ler conta moito.
Ademais, o artista Fernando Yáñez estará a disposición de tódolos interesados ese mesmo sábado e mais o seguinte, 28 de setembro, a partir das 19.00 horas, para conversar sobre a posibilidade de crear un colectivo artístico con sede no propio Espazo.
