20190828. Diferentes grupos de renome actuarán na Pobra do Caramiñal o venres 30 e sábado 31. O motivo é a celebración do festival Entrebateas que acada xa a súa cuarta edición, consolidándose no calendario de eventos do municipio pobrense. De feito, o ano pasado contou cunha participación de en torno a 2.000 persoas ao longo de cada unha das xornadas. No acto de presentación estiveron o alcalde, Xosé Lois Piñeiro; a concelleira de Cultura, Patricia Lojo; e Ricardo Boo, organizador da cita.
A edil anunciou que este ano contarán con varias novidades. A primeira é a actuación a bordo dun catamarán de Sabela King & The Heartbreakers no atardecer do venres 30, pois “é máis viable porque así a xente vai a desfrutar do concerto e, cando chega, xa se vai encontrar co resto dos concertos.” Ademais, a acampada farase no polideportivo situado na rúa Venecia para maior comodidade e contarase cun Punto Lila, emprazado ao lado da zona de merchandising, “para concienciar contra a violencia de xénero e as actitudes sexistas.”
Na súa intervención, Ricardo Boo recordou que a actividade en catamarán é a única que ten un custe, pois o resto de concertos son de balde. Deste xeito, a saída en barco está prevista para as 17.00 horas e a chegada ao redor das 20.00 horas. Percorrerase a ría de Arousa con música, ofrecendo unha degustación de comida –inclúe mexillóns, empanada e pizza- e cata de Bodegas Lodeiros. Tamén haberá barra con outras bebidas. Debido a que o límite de prazas establécese en 100 persoas, os interesados poden adquirir os tíckets a un prezo de 30 euros no establecemento hostaleiro pobrense A Cova da Vella ou reservando online a través do enderezo electrónico silenciorotolive@gmail.com. Así mesmo, anunciou que o venres actuarán Grilo, Atomic Zeros, Toundra e Aphonnic; mentres que o sábado farán o propio LDH (Los Del Humo), Strikeback, Koma e Escuela de Odio sendo “máis cañero para manter a nosa tendencia metalera dentro do festival.”
Pola súa parte, o rexedor destacou o apoio a este evento por parte do Consistorio, “cun investimento forte para o Concello e tamén toda a loxística posible que poñemos a disposición do festival.” Convidou así á veciñanza a escoitar os diversos grupos e participar na actividade en catamarán.
Unha cita imprescindible para os amantes do metal, hardcore, trash e rock.