Ribeira e Pobra van estar no epicentro das rutas marítimas este verán, un epicentro descentralizado e conformado tamén por Vigo, Portonovo e Baiona: os portos que forman parte da chamada Travesía Náutica Xacobea Sur. Segundo informou hoxe o Consellería de Cultura e Turismo, o programa O Teu Xacobeo está a impulsar este meses un importante programa de excursións marítimas para complementar dende as rías as etapas terrestres do Camiño de Santiago, e, tamén, “para dar a coñecer o traxecto da entrada da barca de pedra do Apóstolo desde a bocana da ría de Arousa”. Os veleiros (catro) sairán de Ribeira, Pobra, e dos devanditos portos galegos.
As rutas programadas desde Ribeira funcionan con varios horarios de mañá e tarde os martes e venres do mes de agosto. O obxectivo principal é “facer o mesmo percorrido que fixo o corpo do Apóstolo, desde o Océano Atlántico ata o cruceiro do parque de Pedra Pateira, en Santa Uxía, considerado a porta de entrada na Ruta Xacobea do mar de Arousa e Ulla”. Estas rutas están coordinadas polo Concello de Ribeira.
No mes de setembro e outubro, tamén dentro da programación de O Teu Xacobeo, o Concello da Pobra do Caramiñal coordinará unha traslatio cunha ruta en veleiro semellante á ofrecida estes días en Ribeira. E tamén desde o 24 de agosto poranse en marcha rutas xacobeas do mar de Arousa a pé que conectarán a Illa de Cortegada co Camiño de Santiago.
