20190823 A Coordinadora para o Estudo dos Mamíferos Mariños (CEMMA) non cesa este verán de actividade, moita dela centrada na nosa comarca. Onte mesmo foi alertada da presenza dun golfiño común que se atopaba a piques de varar na praia dos Mosqueiros, en Ribeira, cousa que acabou facendo dúas ou tres horas despois de ser avistado preto da beira.
Grazas á boa coordinación da xente que se atopaba no areal, que foi quen deu a voz de alarma sobre o mediodía de onte, e as intervencións do GAEM, do Grupo de Protección Civil de Ribeira e de Cruz Vermella de Ribeira (que puxo en xogo unha padiola para transportar o cetáceo dende a area e máis a súa embarcación, cruciais para o desenvolvemento do traballo), o arroaz puido ser devolto ao mar (arredor das 15.00 horas) e carrexado até a bocana da ría de Arousa, e todo, sinala o CEMMA, no mínimo tempo posíbel e coa maior eficacia.
O CEMMA salientou o bo funcionamento do operativo, que foi coordinado a distancia pola entidade con sede en Nigrán.