20190823. Con motivo do inicio das festas de verán na parroquia ribeirense de Castiñeiras, o Partido Barbanza Independiente (PBBI) solicitará, a través da presentación dunha moción, que o Concello compre a parcela de aproximadamente 2.000 metros cadrados existente a carón da igrexa parroquial e o colexio Sagrado Corazón de Jesús. Segundo manifestan, o obxectivo é abrir unha vía e facilitar zona de aparcamento “debido ás carencias existentes nese aspecto, sobre todo, as horas punta de entrada e saída do referido centro educativo, e tamén durante a época estival debido á gran afluencia á praia situada nas proximidades.”
Nese senso, a formación liderada por Vicente Mariño de Bricio propón que o alcalde inicie as conversacións e negociacións cos propietarios da finca ou a axencia inmobiliaria correspondente para que “no prazo máis breve posible se poda chegar a un acordo para a súa compra e darlle ese espazo ao destino mencionado.”
Así mesmo, entenden que se trataría dunha actuación “moi ben recibida polos veciños”, posto que sinalan que xa deran a coñecer dita iniciativa nun mitin celebrado en Castiñeiras no transcurso da pasada campaña electoral.
Ademais, o grupo municipal suxire que a citada superficie sexa empregada tamén para festexos e eventos populares “nos que se da cita un numeroso público e do que carece, exceptuando o recinto portuario.”
