20190819. A Casa do Concello de Ribeira acolle unha nova exposición desde hoxe e ata o 30 de setembro. Desta vez é a quenda da colección Medusas, da artista de Melide Belén Rodríguez Pazo.
A mostra está formada por 25 obras, sendo acuarelas na súa maior parte, aínda que tamén hai un pastel e unha fotografía. Todas elas son retratos femininos que, en palabras da autora, son “mulleres que che deixan de pedra”, en referencia ao célebre mito grego. A pintora tamén manifestou que son rostros que lle causaron unha profunda impresión, inspirándose en actrices do pasado hollywoodense e personaxes das obras de Shakespeare, entre outros. Ademais, indicou que no proceso de creación non fixo ningún bosquexo previo, posto que foi plasmando directamente a idea final.
Pola súa parte, a concelleira de Cultura, María Sampedro, referiu que esta xa é a terceira exposición que os veciños poden contemplar na Casa do Concello no que vai de verán e agradeceu a súa colaboración para poñela en marcha á comisaria María José Carreira e a Eugenia Gómez, de O Faiado Tenda-Galería.
