20190814. O Concello de Ribeira e a Asociación Corrubedo XI Séculos rubricaron un convenio en virtude do cal a administración municipal contribúe aos obxectivos da devandita entidade coa fin de homenaxear o 1.100 aniversario do nacemento do coto de Corrubedo e da primeira referencia documentada deste topónimo.
O acordo foi asinado no Consistorio polo alcalde Manuel Ruiz e por Antonio Freire, presidente da asociación corrubedá, materializándose nunha subvención de 10.000 euros a empregar en eventos lúdicos e culturais, conferencias, exposicións, mapas e outras accións.
De feito, a Asociación Corrubedo XI Séculos é a entidade organizadora das actividades conmemorativas de mañá con motivo do día da patroa da parroquia, Santa María da Asunción, entre as que se inclúen a Carreira Popular; unha misa solemne na honra da Virxe, ás 12.00 horas; actividades infantís de 16.30 a 20.30 horas -inchables, tren e festa da escuma, entre outras- e un concerto de habaneiras, ás 19.00 horas, que ofrecerá o Coro Parroquial na igrexa.
Ademais, para o 25 de agosto está programada unha comida popular que incluirá a estrea do vídeo institucional destes once séculos.
