20190816. Artemar abriu as súas portas na tarde de onte en Ribeira e está a rexistrar un ambiente excepcional, con numerosas persoas que están a mercar ou curiosear polo cento de postos diseminados nas rúas peonís da cidade, nomeadamente Galicia, Santa Uxía e Rosalía de Castro no tramo preto do mar, ademais da praza do Concello.
O certame conta con diversidade de produtos de alimentación, artesanía, coiro, alfaias, xoguetes, especias, instrumentos musicais ou perfumaría, entre outros, chegados de distintos puntos da xeografía española e de países coma, por exemplo, Portugal, Marrocos, Túnez, Arxentina e México.
Así mesmo, a cita está sendo animada cunha variada programación que incluíu esta mañá teatro de monicreques fronte ao museo municipal a cargo de Pirueta Teatro, música pola rúa ou actividades infantís na praza do Concello, contos do mar por parte de Tragaleguas Teatro, etcétera.
Tamén o tecido asociativo colabora a través de diferentes stands situados na praza consistorial, mentres que artistas coma Antonio Pérez, Luis Polo, Teresa González, Teresa Argibay e J. D. Santarelli amosan e crean en vivo durante os días de feira, así como moitos outros da contorna que agrupan a súa obra en O Faiado Tenda-Galería.
A cita prolongarase ata o 18 de agosto.
