20190701 Non será preciso deixar O Barbanza para asistir e participar nun dos grandes acontecementos musicais da tempada estival: o Festival Entre Bateas da Pobra do Caramiñal, cuxa cuarta edición celébrase os días 30 e 31 agosto. A preparación da nosa gran cita do metal e do hard rock segue adiante sen atrancos no camiño, aínda que xa hai tempo que xa coñecemos o miolo do cartaz e os grupos que o compoñen. Esta semana a organización púxonos perante os ollos (a través do Facebook) o deseño final da camiseta desta cuarta edición de Entre Bateas, que estará á venda (15 euros) en cuestión de horas e que tamén se poderá adquirir in situ, no festival.
Amais, a comezos de xullo foi presentado o cartaz definitivo deste ano, con todas as actuacións programadas. Neste edición pasará polo escenario un elenco de grupos máis que destacado: Toundra, Aphonnic, Atomic Zeros e Grilo, na xornada do 30 de agosto, e Koma, Escuela de Odio, Strikeback e LDH (Los Del Humo) na segunda xornada, a do 31.
Para quen non o saiba, Entre Bateas é un festival centrado no metal, no hardcore, no trash e no rock, e que, ademais de facer un repaso polo máis potente e relevante da música actual destes estilos, é gratuíto e ofrece aos visitantes unha zona de campamento que tamén é de balde. A cita musical vén da man da asociación Xente ás Leiras e conta coa estreita colaboración do Concello da Pobra.
Amais de todo o completo menú musical que ofrece o festival, está programado un percorrido en catamarán, o venres 30 a partir das 17.00 horas, para coñecer a ría de Arousa a golpe de música rock (a singradura farase na compaña da banda Sabela King & The Heartbreakers).
