20190807 O Complexo Medioambiental Serra do Barbanza, emprazado en Servia (Lousame), vén de denunciar a persistencia dunha perniciosa práctica cidadá que se remonta a hai décadas e que aínda se mantén: a práctica de guindar refugallos eléctricos e electrónicos no lixo convencional ou no monte, con todos problemas que isto carrexa (trátase dunha práctica inútil, posto que todos os concellos teñen punto limpo e recollida gratuíta deste material a pé de rúa, e tamén perigosa, porque gran parte do material é contaminante, amais das consecuencias que ten esta práctica para a paisaxe e a conservación dos nosos montes). Segundo informou o Complexo, máis de 1,5 toneladas de residuos de aparellos eléctricos aparecen cada ano nas instalacións da entidade, mesturados co resto de refugallos.
A entidade, da que forman parte (principalmente) os concellos da vertente norte do Banbanza, aproveitou a presentación deste preocupante dato para lembrar a importancia de deixar este tipo de refugallos nos puntos limpos, para o seu correcto tratamento, xa que acubillan material contaminante e “afectan negativamente ao medio ambiente e á saúde”, elementos como os metais férricos, os plásticos, o cobre ou o aluminio.
Ademais, recordou a prohibición de depositalos nos contedores da rúa. Desde o Complexo Ambiental do Barbanza advertiron que sen a mellora da recollida selectiva da fracción orgánica e o resto das fraccións, “resultará difícil conseguir o obxectivo que marca a lexislación de reciclar o 50% dos residuos domésticos no 2020”.
A achega destes e doutros datos da entidade ambiental de Servia coincide no tempo co convite do Concello da Pobra a empregar o punto limpo local e os servizos de recollida de material desbotado que empresta neste e noutros municipios da comarca a empresa Urbaser. Respecto das cousas que poden levarse ao punto limpo ou reclamar que sexan recollidas, son principalmente as seguintes: móbeis, electrodomésticos de todo tipo de trastes vellos en xeral (berces, tendais, colchóns, somieres, sofás, cadeiras, etc).
