20190816 Rianxo e Noia atópanse entre os concellos onde a mocidade que queira adquirir unha vivenda en cadanseus centros históricos contará con importantes axudas do Instituto Galego de Vivenda e Solo (IGVS). As subvencións, dispoñíbeis para os menores de 35 anos consisten en dúas liñas de apoio: unha para a adquisición de vivenda en concellos de menos de 5.000 habitantes e a outra, para a compra en cascos históricos, que é a aplicábel en Rianxo e Noia. O prazo para pedir as axudas fica aberto até o 31 de outubro. A contía total, este ano, é de 1,6 millóns. A iniciativa tamén é extensíbel aos centros históricos de Betanzos, A Coruña, Ferrol, Mugardos, Muros, Neda, Padrón, Pontedeume, Santiago de Compostela e Corcubión.
A axuda destinada a fomentar a adquisición de vivendas en centros históricos por parte do colectivo de menores de 35 anos está dotada para este ano cun orzamento global de 800.000 euros. As vivendas para as que se solicite a axuda deberán cumprir coas seguintes condicións: estaren localizadas nun centro histórico dos enumerados no anexo da Orde do 1 de marzo de 2018 pola que se convocou esta liña de subvencións e que se trate dunha vivenda xa construída (tanto nova como usada). Amais, o prezo de adquisición non superará ao dunha vivenda protexida de 120 metros cadrados, de réxime concertado, no mesmo concello.
O IGVS subvencionará con até 12.800 euros a adquisición de vivenda por parte de menores de 35 anos nos centros históricos das sete grandes cidades e con até 10.800 se a vivenda se atopa na zona monumental de calquera outro concello galego. O importe da axuda non poderá superar, en todo caso, o 20% do prezo de adquisición.
