20190809 A nova Lonxa de Ribeira celebrou esta semana (concretamente o mércores 7), os seus dous anos de vida (24 meses como referente galego e estatal de dúas cousas ben concretas: por unha banda, da actividade pesqueira e a comercialización de peixe e marisco en todo mundo, e, pola outra, da innovación tecnolóxica, loxística e de xestión no sector).
Os dous anos de traxectoria foron conmemorados con información nas redes (incluído un pequeno vídeo de celebración no Facebook, onde a lonxa ten unha comunidade de seareiros de preto de 3.000 integrantes) e co programa de visitas guiadas que redobrou actividade e que mesmo apareceu reflectido ao detalle na TVG, en A Revista.
Respecto das visitas guiadas polas súas dependencias, estanse a levar a cabo este verán co fin de amosarlle a residentes e visitantes os diferentes procesos de traballo na lonxa, poñendo o foco nalgúns dos puntos máis rechamantes do seu día a día: as poxas de peixe ou os percorridos que segue o peixe dende que entra no recinto (unha media de 150.000 quilos de produto ao día) até que sae camiño de mercados e locais hostaleiros de todo o mundo (o 90% para España e o resto para o estranxeiro).
Os percorridos estanse a realizar con periodicidade semanal, teñen unha duración de máis ou menos tres cuartos de hora e inclúen visitas a boa parte dos espazos da lonxa, adicados cada un deles a un tipo determinado de traballo relacionado peixe (os diferentes elos dunha mesma cadea).
A lonxa comezou a súa actividade oficial no verán de 2017 e xa dende o primeiro intre quedou claro que a actividade de promoción e visualización do seu día a día ía ser un dos seus obxectivos fundamentais. Os percorridos guiados, ademais, son unha forma de regularizar e ordenar unha práctica moi estendida nestas datas: as visitas da xente que non é residente habitual en Ribeira pero que pasa as súas vacacións no concello e quere coñecer, de primeira man, o funcionamento do q ue foi e segue a ser o corazón económico de Ribeira.
