20190701. O dinamizador da Sala Museo Municipal de Ribeira, Miguel Ángel Vidal Lojo, ofreceu na noite do venres na casa do mar de Corrubedo unha charla dedicada á arqueoloxía desta parroquia.
Vidal Lojo, que como arqueólogo foi o responsable dalgunhas escavacións próximas coma a de Castro da Cidade, remontouse á época megalítica para referenciar os primeiros vestixios dos que hai constancia dentro do territorio histórico de Corrubedo coma son as súas mámoas situadas no monte Facho. Tamén acreditou a existencia dun castro sen escavar no cumio deste monte do que, a día de hoxe, pódese recoñecer na súa superficie un tramo da súa muralla. Así mesmo, sinalou a posibilidade da existencia doutro castro na cima do monte Tahúme. O menhir de Bretal ou unha estela funeraria romana descrita polo Pai Sarmiento tamén foron abordados ao longo da súa intervención.
A charla, de case unha hora de duración, espertou un grande interese entre a veciñanza congregada, a cal contribuíu a enriquecer a exposición cos seus comentarios e reflexións.
Dita cita foi unha iniciativa promovida pola asociación Corrubedo XI Séculos coa colaboración do Concello de Ribeira. Francisco Sánchez Fraga obsequiou a Vidal Lojo no nome da entidade cunha publicación xenealóxica de Edmundo Fraga López, na cal se analizan oito apelidos típicos da parroquia, entre eles, o propio Lojo, así como un obsequio institucional consistente nunha réplica dunha das pedras que marcan os límites históricos do antigo coto de Corrubedo, a cal foi realizada polo artesán e veciño do pobo Manuel Olveira Franco.
A próxima charla da asociación terá lugar na casa do mar o venres, 5 de xullo, ás 21.00 horas e será impartida polo arquiveiro municipal José Antonio Otero Sobrido cunha conferencia titulada Corrubedo, anos 50.
Esta actividade atópase encadrada na programación do Xuño da Cultura e as Artes.
