20190712. A programación do Verán Cultural rianxeiro para este mes de xullo inclúe unha ampla variedade de actividades. Así, o luns 15 terá lugar o concerto de Sés na praza Castelao a partir das 22.30 horas. O xoves 18, ás 22.30 horas, proxectarase o filme A sombra da Lei nos xardíns do Parque da Martela. Os máis pequenos da casa poderán desfrutar no Auditorio do teatro infantil o venres 19, ás 12.00 horas, coa obra 4 monos de Tropa de trapo. Ademais, ás 21.30 horas celebrarase o XV Ciclo de Bandas: Banda de Música Recreativa e Cultural da Bandeira na praza Rafael Dieste. A música volverá inundar a praza de Castelao o sábado 20, ás 22.30 horas, coa actuación Son galego, son cubano de Roi Casal. A gata con zocos chegará á rianxeira praza Rafael Dieste o mércores 24, ás 22.00 horas, da man da Cova das Letras e a Banda da Escola de Música de Rianxo. Os amantes da astronomía teñen unha cita no paseo da Ribeira o domingo 28, ás 22.30 horas, coa observación nocturna do firmamento. Así mesmo, do 25 ao 28 terá lugar a Feira do Libro de Rianxo.
