20190724. A praza do Concello de Ribeira acolleu na tarde de onte, ás 20.00 horas, unha concentración organizada por Mulleres en Acción. Numerosa veciñanza amosou a súa repulsa aos últimos feminicidios sucedidos, un deles en Sancovade (Vilalba). O domingo a sociedade galega volveu a ser sacudida por un novo asasinato machista, pois Manuel Vázquez Vázquez decidiu quitarlle a vida á ex-muller.
A orde de afastamento que pesaba sobre este home non impediu que María del Carmen se convertese na segunda vítima de violencia machista en Galicia no que levamos de ano, a número 33 a nivel estatal.
No manifesto lido expresaron que “as cifras non deixan de medrar, xa que os Xulgados Galegos recibiron dende comezos de ano 1.736 denuncias por violencia machista, un 38% máis que nas mesmas datas do ano pasado.”
Deste xeito, condenaron este asasinato e denunciaron as discriminacións, a desigualdade e a violencia que “día a día sofremos as mulleres e que leva, nas últimas consecuencias, a que sexamos asasinadas, e no día a día a que sexamos apartadas.”
Así mesmo, reivindicaron que “querémonos libres e querémonos vivas.”
Por último, rotularon na Columna das Vidas Fendidas os nomes das últimas mulleres asasinadas por mor da violencia machista.
Ribeira uniuse así á trintena de cidades repartidas por todo o territorio galego que clamaron contra esta problemática que segue cobrándose vidas e agredindo a integridade física e psicolóxica das mulleres.
