20190729. A Asociación Sociocultural Fogo Fatuo de Rianxo, en colaboración coa Área de Cultura, Xuventude, Educación e Normalización do Concello de Rianxo, desenvolverá unha serie de actividades dentro da programación do Verán Cultural 2019.
Deste xeito, o vindeiro sábado, 17 de agosto, celebrarase o XVII Festival de baile e música tradicional, a partir das 21.30 horas, na praza de Rafael Dieste. Esta cita contará coa participación de diferentes agrupacións de baile, pandeireta e gaita formada por nenos e maiores, persoas cun rango de idade comprendido entre os 3 e os 70 anos. Así, ofrecerán unha noite impregnada da cultura tradicional con muiñeiras, xotas, rumbas e agarrados.
Ademais, este ano contarán como grupo convidado coa Agrupación Folclórica Ancoradoira de Culleredo.
Por último, durante o festival tamén se realizarán diferentes sorteos de agasallos e produtos de artesanía galega.
