20190730 Esta semana, concretamente este mércores 31 de xullo, comezan oficialmente as Noites de Jazz que organiza a Concellería de Cultura de Rianxo que dirixe Raquel García Abuín co obxectivo de mergullar a residentes e visitantes no devandito estilo musical e nas súas múltiples variantes e vertentes. Será en boa medida un festival interactivo, con todos os elementos dirixidos a esluír a liña imaxinaria que adoita separar os músicos do público. Aquí os espectadores, grazas en parte aos obradoiros previstos que complementan o cartel de concertos, tamén será axente activo do festival.
A maiores haberá unha exposición de cadros sobre a temática do jazz, historicamente un estilo moi vencellado á fotografía e á pintura. A mostra, a cargo do artista Delio Sánchez, inaugurouse hoxe no auditorio rianxeiro, coincidindo coa presentación oficial do certame.
Temos toda a información sobre os grupos, os obradoiros e as mostras témola dispoñíbel en noitesdejazz.gal.
Respecto dos concertos, serán todos (agás o do sábado 3 de agosto, que será na rúa de Abaixo ao mediodía) na praza de Rafael Dieste a partir das 22.30 horas. Actuarán EMR Ensemble (o martes 30), ADN Cuarteto (o mércores 31), David Lojo Quartet (o xoves 1 de agosto), Menil & Amigos (o venres 2) e a Low Bay Hot Band (o sábado 3 de agosto, na rúa de Abaixo a partir das 13.00 horas).
O festival terá unha vertente educativa que vén con catro actividades a desenvolver no centro sociocultural do Auditorio de Rianxo: un curso sobre contrabaixo e baixo eléctrico no jazz e músicas afíns (o mércores 31 de xullo de 10.00 a 14.00 horas, a cargo de Alfonso Calvo), unha clase maxistral de trompeta (o xoves 1 de agosto, a cargo de David Lojo, en horario de 10.00 a 14.00 horas), un curso sobre arranxos para música moderna e jazz (ao venres 2 de agosto, da man de Alfredo Susavila, en horario de 10.00 a 14.00 horas) e un curso de iniciación ao trombón (o sábado 3 de agosto, de 10.00 a 14.00 horas, da man de Ramiro Lamas).
Por último e non menos importante, as Noites de Jazz teñen unha faceta expositiva. Estamos a falar da exposición que acubilla dende hoxe a sala de mostras do Auditorio de Rianxo, unha aproximación pictórica ás vibracións jazzísticas da cidade de Nova York a cargo do artista Delio Sánchez. Estará aberta ao público até o 17 de agosto, en horario de 10.00 a 13.30 horas.
