20190702 Quen queira rock, cultura mariñeira galega, modernidade e tradición popular, todo mesturado e axitado con agarimo e talento, vai ter todos estes ingredientes o mes de setembro en Rianxo, o día 14 no Parque Galiza como epicentro da actividade musical, popular e literaria. Estamos a falar do festival Rock in Rian, O Festival da Ría, un destacado certame de balde que promete ser a gran despedida festeira do verán. Por certo que a organización (a comisión de Juadalupeñas de Rianxo) presentou recentemente o cartaz desta súa 12 edición. Actúan Reincidentes, Ebri Knight, Dios Ke Te Crew, Festicultores, Mekanika Rolling Band e La Duendeneta.
O cartel acompáñase de actividades complementarias que encaixan á perfección co devandito despregue de decibelios: haberá un roteiro literario por Rianxo, celebrarase cun pasabares o doceavo aniversario do certame e a contorna urbana da vila será convidada a participar con ruadas musicais e concertos itinerantes.
Segundo informou este mes de xuño a organización, este ano o festival estará cen por cen adicado á xente do mar. “Gustaríanos homenaxear a todos eses veciños e veciñas que traballaron por e para Rianxo a base de suor e sangue”, por ese motivo deseñouse unha camiseta exclusiva do certame que honra a memoria dun ilustre do mar: Vicente, “protagonista da nosa camisola”, deseñada por Nove Noel. Estas e outras actividades estanse a complementar con importantes descontos no comercio local a quen se faga socio do Rock in Rian.
