20190729. Unha serie de cuestións sobre a rúa Fernández Bermúdez serán presentadas no pleno ordinario de Ribeira por parte do grupo municipal do PSdeG-PSOE.
Segundo os socialistas, no mes de maio do 2017 comezaron as obras de pavimentación nun tramo do citado emprazamento, coa construción do muro de contención e beirarrúas, quedando paralizada dita actuación no mes de xullo do mesmo ano ata a actualidade.
O grupo municipal manifesta que “a razón esgrimida foi a dun problema de firme, ea un acordo coa propiedade da casa vella para efectuar a demolición acordada.” Así mesmo, expresan que sobre a obra aprobada en pleno e licitada, “só se fixo aproximadamente o 25%, estando o restante 75% pendente de execución, debido a un problema xeotécnico.”
Deste xeito, o PSdeG-PSOE entende que, ao tratarse dunha obra que pode considerarse menor, as distintas variables de execución pasan por unha posible pilotaxe con muro de contención, pero tamén afirma que pode realizarse cunha falsa lousa de soporte e pilares illados ou con bloques de pedra, tipo perpiaño ou ménsula.
Por todo o exposto, farán as seguintes preguntas: “1. Sr. Alcalde, pode decirnos o motivo desta tardanza, a cal desde o noso grupo non lle encontramos explicación? 2. Porque se priva aos veciños desta obra tan importante para a infraestrutura viaria, de acceso ao complexo da Fieiteira? 3. Que variable construtiva se vai impoñer?”
