20190723. O grupo municipal do PSdeG-PSOE de Ribeira levará a pleno o Plan Madruga que se desenvolve no CEIP Plurilingüe de Palmeira. Este centro presta esta axuda, desde os últimos anos, coa intención de acadar a conciliación familiar, pero supón para as familias un gasto de entre 40 e 50 euros mensuais por unha hora deste servizo, dependendo do número de nenos que o precisen.
Os socialistas manifestan que existen numerosas subvencións europeas destinadas a fomentar e facilitar tanto a igualdade coma a conciliación familiar, “subvencións máis fáciles de tramitar e de conseguir por parte dun Concello que por parte dunha ANPA.” Deste xeito, indican que “con estas subvencións, o servizo Madruga pode realizarse sen supoñer custe algún para o Concello e co cal poden beneficiarse numerosas familias.”
Así mesmo, sinalan como exemplo ao Concello da Pobra do Caramiñal, o cal “tramita estas subvencións e prestan o servizo Madruga nos seus diferentes centros escolares, dispoñen dunha bolsa de monitores, e ás familias suponlle un custe de só 12 euros ao mes por unha hora de servizo.”
Por todo isto, requiren que se solicite por parte do Concello de Ribeira, a Deputación e a Xunta de Galicia, unha subvención para o próximo curso 2019-2020 a favor do CEIP Plurilingüe de Palmeira, para que así poidan continuar co Plan Madruga “en beneficio das familias, logrando así acadar a conciliación familiar.”
