20190718 O Festigal, un dos grandes acontecementos do 25 de xullo, Día de Galiza, vai contar coa presenza dun dos nosos máis prometedores escritores: Carlos Lixó (Carreira, Ribeira, 1991), quen participará nas actividades literarias do macro-certame compostelán. Máis polo miúdo, terá presenza activa na sección A Galería das Letras, que servirá de palestra para dar a coñecer as novidades editoriais na nosa lingua (un total de 10) e para acubillar propostas de lectura e encontros con autoras e autores. Será na tarde do 25 de xullo no Campus Sur de Santiago.
Ás 17:00 h. será a presentación do libro As Casas, do Carlos Lixó, editado por Espiral Maior e que recibiu o XXX Premio Nacional de Poesía Xosé María Pérez Pallaré. Na actividade participarán o propio Carlos Lixó, e máis Marta Dacosta, escritora.
Máis tarde, ás 17.30 horas, será a quenda de Manuel María. Obra Teatral, editado pola Casa Museo Manuel María. A presentación do libro Infamia, de Ledicia Costas e editado por Xerais, será ás 18:00 h. Ás 18:30 h. virá a quenda de Resistencia e expansión cultural. Crónica do movemento cultural galego na ditadura (1961-1976), da Revista Terra e Tempo. Senlleiras, de Antía Yáñez preséntase ás 19:00 h. Sobre as 19:30 h. estarán Daniel Asorey e Susana Sánchez Aríns para dar a coñecer Transmatria, de Xerais. Para rematar, Suso de Toro e Ledicia Costas presentarán ás 20:00 h. Fóra de si, de Suso de Toro editado por Xerais.
Tamén haberá un espazo de encontro con autores e autoras a partir das 16:30 horas co tamén ribeirense Carlos Callón (autor de obras tan senlleiras como Amigos e sodomitas, ou Galegofalantes e Galegocalantes) e con Ana Pillado e Manuel Monge.
Sobre Carlos Lixó
Carlos Lixó Gómez, nado o 11 de novembro de 1991 en Carreira (Ribeira), obtivo en dúas ocasións o premio de relatos curtos do Concello de Cambre e o terceiro premio de relatos curtos do Concello de Ames. Publicou poemas na revista Dorna e colabora co xornal dixital Sermos Galiza.
No 2017, segundo nos lembra a Galipedia, foi merecedor do Premio Nacional de Poesía Xose María Pérez Parallé polo seu poemario presentado co título Murallas de pedra sen cemento que duran para sempre, e que foi publicado co título As casas, publicado por Espiral Maior. O xurado estivo composto por Chus Nogueira, Jesús Castro Yáñez e María Lado.
No 2018 recibiu o premio a artigos xornalísticos normalizadores do Concello de Carballo con Alpabardas verdes.