20190729. Os nacionalistas de Ribeira requirirán ao goberno local información sobre as verteduras de augas fecais que se producen no río Listres e anuncian que demandarán actuacións para evitar que estas se produzan debido aos problemas ambientais e molestias que ocasionan na veciñanza de Castiñeiras.
O voceiro do BNG, Xosé Antonio Vázquez Cobas, lembrou que “a mala praxe e xestión feitas polo Partido Popular ocasionaron un gasto adicional de 600.000 euros de fondos públicos nun proxecto de saneamento que foi mal planificado e que ocasionou importantes problemas entre os veciños e as veciñas de diversas zonas do municipio como Castiñeiras, O Touro e Aguiño.”
Respecto a isto último, o BNG rexistrou unha iniciativa para que o Concello de Ribeira se comprometa a corrixir varios puntos de vertedura que existen no río Listres e que así sexan canalizados cara á rede de saneamento.
Vázquez Cobas tamén asegurou que o Bloque estará “vixiante para que os prazos para solucionar os problemas se cumpran despois de que nas sucesivas reunións de seguimento os organismos responsábeis, Augas de Galiza e Aquaest, se comprometeran a ter as obras rematadas no verán deste ano.”