Celebrouse finalmente, este domingo 21, unha das grandes citas da Festa da Dorna, o Jran Prix de Carrilanas, que ía pola súa XXX edición. Os participantes non desaproveitaron tan redonda e histórica convocatoria (o trinta aniversario) para ofrecer ao público dorneiro que encheu as beiras da costa da Mámoa e da rúa Rosalía de Castro un novo menú capítulo de Autos Locos adaptado á xeografía ribeirense: aquí do que se trata non é despeitearse coa velocidade das carrilanas que baixan, senón de celebrar a arroutada de quen se atreve a baixar nos vehículos que compiten.
Houbo moitos protagonistas, como por exemplo o actor Manuel Manquiña, que tivo o mérito de retransmitir a proba sen que moitos se decatasen de que non era de Ribeira, tal foi o seu entusiasmo cos vehículos que baixan e a súa capacidade de adaptación ao falar dorneiro. Outro dos protagonistas (esta vez colectivo) volveu ser o grupo da peña Boi de Putas, que volveu demostrar a súa escasa capacidade para negarlle unha baixada pola Mámoa a quen se achegue o seu vehículo e pida unha praza: a rolda de pasaxeiras e pasaxeiros no vehículo da peña (unha homenaxe á estación de autobuses acabada de derrubar) roldou este ano a trintena, e por certo que entre a tripulación atopábase Manuel Manquiña (ao que non custou moito traballo convencelo para subir, segundo contaron) e, recuncando (que xa non é a primeira vez que participa no Jran Prix), o alcalde ribeirense, Manuel Ruiz.
Igualmente celebradas foron o resto das carrilanas que baixaron cara ao centro de Ribeira, entre as que se atopaban unha recreación perfecta do clásico Scalextric Camaremo (de Os Polvos do Vilar, con música de Azúcar Moreno e Camela incluída), unha homenaxe ao universo de Xogo de Tronos (Berberechos Asasinos) ou a reconstrución case perfecta dunha nave da alianza de Star Wars, con R2D2 incluído, co-pilotando (Os Pintos Joden Quintos).
