20190702.- O Club Náutico de Riveira presentou a IX edición da Regata Congalsa – Volta a Sálvora, que se celebrará este sábado 6 de xullo con saída ás 14.00 horas desde as inmediacións da bocana de entrada ao porto deportivo.
Destinada ás clases Regata, Regata/Cruceiro e Cruceiro do ORC, terá un formato de percorrido costeiro, contorneando as illas e illotes de Rúa, Sálvora, Noro e Vionta, estimando a organización nunha vintena de veleiros a participación. A quenda de intervencións abriuno José Luís Torres Colomer, presidente do club riveirense quen quixo “Agradecer en nome do Náutico de Riveira o labor que Congalsa está a facer en prol da vela, tanto na de cruceiro como na de vela lixeira. O pasado ano Congalsa facilitou a compra de seis fermosos Optimist, con remolque e ver que fortalecen o noso equipo de regatas”.
Pola sua banda José Luís Lomba, Comodoro do club comentou que a proba “É unha regata tradicional con moita aceptación en Riveira e a súa contorna. Contamos con todos os medios de seguridade e Salvamento Marítimo. A saída está programada ás dúas da tarde e darase contorna á bocana do porto deportivo de Riveira para facela máis vistosa”.
A previsión meteorolóxica prevé unha compoñente co eixo no sur, duns 10 a 15 nó de intensidade que podería estar acompañada dalgún que outro pequeno chuvasco. A quenda de intervencións pechouno Luís Miguel Simarro, director xeral de Congalsa. “Estamos encantados de participar un ano máis, e con esta edición xa son nove. É unha regata que é un verdadeiro reto, polo que supón navegar a vela entre as illas e illotes. A vela identifícase coa política de responsabilidade corporativa de Congalsa, onde o traballo en equipo, o esforzo e o sacrificio son valores que compartimos na empresa”, explicaba Simarro.
