20190722. No ecuador das celebracións, a Festa da Dorna continúa hoxe en Ribeira. Ás 12.01 horas, o pallaso Peter Punk asumirá a responsabilidade de animar o comercio polas rúas e prazas, ademais de ter lugar unha sesión de arte a cargo de Mónica de Nut.
Xa na tarde, a partir das 17.32 horas, celebrarase a XXIX edición dos ‘Xojos do Mar’, onde os dorneiros se poñerán a proba en diversas actividades, entre as que se atopan a ‘Pesca do muxo radioactivo’, ás 17.39 horas; o ‘Achikeitor’, sen horario determinado; ‘Isa-la Candorca’, ás 18.01 horas; ‘Lansamento de Risón’, ás 18.24 horas; ‘Poñelo timón’, ás 18.43 horas; ‘Pasar pola quilla’, ás 19.03 horas; ‘Saltos dende o paredón’, ás 19.26 horas; e ‘Pau ensebado’, ás 20.01 horas.
Un dos pratos fortes da xornada e con máis arraigo na historia destes festexos terá lugar ás 20.53 horas. As peñas poñerán a exame os seus enxeñosos aparellos deseñados co obxectivo de tentar voar e gañar o ‘Jran Premio Ícaro de Voo sen Motor’.
Ás 23.14 horas, o parque García Bayón acollerá a XXXI edición do ‘Exame de Patróns’ e, ás 00.47 horas, seguirá o Rock & Dorna coa actuación de Chamaquito Pistolas e as Balas Perdidas.
