20190730. Mañá, mércores 31, comezan as Festas de Verán de Ribeira. Por iso, desde a Concellería de Cultura e a Comisión están dando as últimas pinceladas encamiñadas a que os asistentes desfruten o máximo posible desta celebración.
Así, informan de que a organización acadou un acordo cos feirantes para que tódolos días de festa, en horario de 19.00 a 20.00 horas, as atraccións funcionen sen música para facilitar que as nenas e nenos que padezan autismo, TDAH ou trastornos similares poidan divertirse con estes xogos.
Por outra banda, e ao igual que aconteceu na Festa da Dorna, contarase cun Punto Violeta de información e prevención contra as agresións sexuais. Estará habilitado no Malecón durante o venres e o sábado, en horario de 00.00 a 03.00 horas.
Ademais, durante estas dúas xornadas, venres e sábado, a festa contará con sanitarios móbiles accesibles.