20190704 Preto de 500 persoas, deportistas locais de todas as idades, estaban xa inscritas este xoves 4 de xullo (a última hora da tarde) para participar na andaina ciclista ribeirense do domingo. Estamos a falar do Día da Bici de Ribeira, que se celebra o día 7 de xullo pola mañá (a partir das 11.00 horas dende a praza de España, que será, tamén, o punto de chegada, pois trátase dunha bicicletada circular). O obxectivo dos organizadores será novamente reivindicar a mobilidade non contaminante, a confraternidade arredor da bici e o deporte en comunidade.
Trala organización atópase o Concello de Ribeira, xunto con empresas colaboradoras locais: Podium, Sport Bike, Gadis, La Fortuna Administración de Loterías, Deportes Estévez, o Centro de Fisioterapia María Martínez Paz e Os Saltamontes Club Ciclista. A andaina colectiva complementarase con algunhas actividades destinadas a fomentar a participación e reivindicar o uso deste vehículo, como por exemplo o sorteo de material deportivo e de dúas bicicletas. As persoas que queiran sumarse á cita aínda poden facelo de xeito online na páxina web do Concello de Ribeira, unicamente achegando os seus datos persoais e confirmando a súa participación.