20190712. Aguiño dará mañá a benvida ás súas festas, as cales se desenvolveran do 13 ao 16 de xullo. A verbena a cargo do Dúo Rosán e a Macrodiscoteca CDC marcará o inicio na xornada de mañá.
O día do domingo 14 arrancará ás 10.00 horas coas bombas de palenque e os pasarrúas de gaiteiros para, ás 12.00 horas, un tren percorrer as rúas do pobo. Cando a fame comece a facer acto de presencia, ás 12.30 horas, será o momento de acudir á gran sardiñada amenizada polo Grupo Pan de Millo. Á noite tocará mover o esqueleto, a partir das 22.30 horas, coa Discoteca Móbil Eme e a orquestra El Combo Dominicano.
O luns 15, os máis preguiceiros espertarán ás 10.00 horas coas bombas de palenque e pasarrúas de gaiteiros. Os cativos desfrutarán de xogos, inchables e festa da escuma ás 11.00 horas. O Dúo Explosión, a orquestra Gran Parada e a Disco Móbil Chocolate asumirán a responsabilidade de poñer a todo o mundo a bailar a partir das 22.30 horas.
O último día das festas, martes 16, a xornada comezará coas bombas de palenque, ás 10.00 horas. A Misa e procesión marítima acompañada pola Banda de Música de Negreira terá lugar a partir das 11.30 horas, para despois acudir ao picoteo disposto no local parroquial. Ás 22.30 horas comezará a actuación da orquestra Trovadores e o espectáculo pirotécnico programado para 00.00 horas porá o broche de ouro a catro días de celebración.