20190730. Por terceiro ano consecutivo a Fundación Celta vai celebrar no municipio ribeirense un campus de verán en alianza co Atlético Riveira e co Concello.
Para falar desta iniciativa compareceron no Consistorio a concelleira de Deportes, Juana Brión; Álex Abalde, como coordinador dos campus da Fundación Celta; e Andrés Martínez, directivo do Atlético Riveira.
A iniciativa terá lugar do 5 ao 9 de agosto na Fieiteira e está dirixida a rapazada de entre 4 e 16 anos. O horario será de 10.00 a 14.00 horas agás o venres 9, no que se prolongará á tarde para celebrar un pequeno acto de clausura.
O prezo da inscrición é de 132 euros excepto para os empadroados no concello de Ribeira, que verán rebaixado o custe ata os 119 euros. As inscricións poden formalizarse ata este venres na páxina web do Celta de Vigo http://www.rccelta.es/index.php/es/campus-de-verano-de-la-fundacion-celta-2018.
Álex Abalde destacou a idoneidade desta acción para educar en valores aos pequenos desde unha perspectiva lúdico-deportiva e anunciou que haberá sorpresas no transcurso do campus. Ademais, Andrés Martínez precisou que, pola experiencia de pasadas edicións, non só suscita o interese de veciños do entorno, senón tamén de moitos visitantes que veranean aquí.
Pola súa parte, Juana Brión salientou que é un pracer colaborar desde o Concello neste tipo de iniciativas para promover hábitos saudables entre a veciñanza desde idades temperás.
