Segundo fontes fidedignas consultadas polo Barbanza, Vicente Mariño de Bricio e José Manuel Vilas Álvarez, cabezas de lista do PBBI e PSdeG-PSOE respectivamente, mantiveron unha reunión nun local hostaleiro do municipio ribeirense. Ao parecer, estarían achegando posturas para un posible pacto que posibilitase o cambio da alcaldía.
Así mesmo, tentarían acadar o apoio do BNG, a pesar de que estes celebraron o sábado unha asemblea local na que aprobaron a abstención do partido no pleno de investidura, ao mesmo tempo que ratificaron a Xosé Vázquez Cobas como líder da formación.
Coméntase que Vicente Mariño estaría disposto a cederlle a alcaldía aos socialistas ou aos nacionalistas co obxectivo de facilitar o cambio na alcaldía. Os socialistas ribeirenses celebrarán este venres unha xuntanza para decidir a súa postura cara a elección de alcalde o sábado dia 15.
