20190620 O panorama comarcal de publicacións literarias é unha gráfica ascendente. Non só pola calidade das propostas, senón tamén, pola cantidade das e dos principais responsábeis dos lanzamentos: as escritoras e escritores. Precisamente por estas dúas características, calidade e cantidade, salienta a publicación Liñas Compartidas, que vén de saír do prelo da man do selo noiés Toxosoutos.
Para quen o saiba, Liñas Compartidas é o froito dun traballo colectivo de creación realizado ao abeiro do Obradoiro de Escrita Creativa de Rianxo (organizado pola AELG, co patrocinio da Deputación da Coruña e da Xunta e para o que se contou coa colaboración do propio Concello). Foi, en certa maneira, como aplicar á literatura as novas metodoloxías de traballo colaborativo: coworking literario.
Á fronte do obradoiro, coordinándoo, atopábase un dos nosos grandes autores actuais, Antón Riveiro Coello, senlleiro escritor limiao afincando en Boiro. O resultado foi cualificado de éxito dende moitas frontes, incluído o prestixioso blog Caderno da Crítica que comanda Ramón Nicolás, onde se puxo o foco no “talento do libro” e nos máis que relevantes detalles que xorden de ter xuntando tantas e tan diferentes voces e perspectivas: “Vinte e dúas novas voces que constitúen unha valiosa canteira para a nosa literatura”.
Trátase das seguintes autoras e autores: Aida Barros Ces, Ana Belén Noya Ordóñez, Antón Nuñez Millán, Begoña Miguéns García, Carlos Descalzo Ferradáns, Carme Toba Trillo, Carmen de Milmanda, Iria Figueira Villanustre, Luís Miguel Ramos Silva, Marina Losada Vicente, Mauricia Ces Quintáns, Moisés Suárez Abel, Mónica González Alonso, Natividad Rey Ordóñez, Nela Valado, Noelia Toledano, Óscar Reboiras Loureiro, Pepa Martínez Vicente, Ramiro Ouviña Ouviña, Rebeca R. Viturro, Rita Sánchez Dosil e Uxía Otero Dios. Toda a sorte do mundo para estas novas voces.
O obradoiro do que abrollou Liñas Compartidas desenvolveuse entre setembro e outubro do pasado ano. Como dato salientábel, no se quixo desaproveitar nada do carácter aberto, experimental e participativo da obra, alentando a autoría colectiva dalgunhas creacións, que se converteron en escrita de até seis novos talentos literarios. Estes contos son Alén dos Alén, Mar de papel enxurrado, O can de Caín e O viaxeiro das estrelas. O resultado final: máis de 400 páxinas que son a milagre dunha “fermosa experiencia colectiva”.